2026 жылғы 3 қарашадан бастап ЭСФ АЖ 10-жолдағы «Жеткізушінің санаты» өрісінде экспедитор немесе комиссионер белгіленген шот-фактураларды жаңаша тексереді. Енді G бөлімінің бірінші жолында сыйақы болуы міндетті: қызметтің нақты атауы және шығу тегінің «6» белгісі. Мұндай жол болмаса, ЭСФ өтпейді – 1С-тен жібергенде де, XML импорттағанда да.
Уақыт аз. Көлік экспедициясы шарты және шарттары комиссия шартына сәйкес келетін шарт бойынша қызметтерге шот-фактура ай қорытындысымен, келесі айдың 20-сынан кешіктірілмей жазылады (Салық кодексінің 493-бабы 2-тармағының 5-тармақшасы). Демек, қазандағы айналымдарды 20 қарашаға дейін ресімдеу керек, және көптеген бухгалтер жаңа тексеруді дәл солардан көреді.
Төменде – қатенің мәтіні, талаптың қайдан шыққаны, базада нені өзгерту керегі және әзірге ешкім нақты түсіндірмеген жайттар.
Қате қалай көрінеді
Хабарламаны PRO1C талдауы бойынша келтіреміз:
Для категории поставщика «Экспедитор» или «Комиссионер» первая строка раздела G должна содержать наименование «Вознаграждение по договору транспортной экспедиции либо по договору, условия которого соответствуют условиям договора комиссии» и признак товара/услуг «6». Номер строки: 1.
Әдетте себебі екеу: базада қызмет басқаша аталған («Транспортно-экспедиторские услуги», «Комиссионное вознаграждение») немесе сыйақы жолы бірінші емес, тасымалдаушы қызметтерінен кейін тұр. Мәтін сөзбе-сөз салыстырылады, бос орын, әріп регистрі және тыныс белгілері де ескеріледі. Соңындағы бір артық нүктенің өзі құжатты қайтадан кері қайтарады. Атауды орысша, дәл осы күйінде қалдыру керек.
Заң мұны талап етпеген, жүйе талап етеді
Салық кодексі сыйақының бөлек жолмен бөлініп көрсетілетінін ғана айтады: экспедитор үшін – 494-баптың 2-тармағы, комиссионер үшін – 495-баптың 5-тармағы, әрі комиссионерде бұл «шот-фактурада сыйақы болған кезде» деп жазылған. Жолдың атауы мен реттік нөмірі туралы кодексте ештеңе жоқ. ЭСФ жазып беру қағидаларынан да (Қаржы министрінің № 629 бұйрығы, 2026 жылғы 28 қыркүйектегі № 646 бұйрық редакциясында) мұндай сөздерді таппадық, PRO1C да соны жазады.
Негіз – МКК хабарламасы: ЭСФ АЖ-да сыйақыны көрсету функционалы іске асырылды, бірінші жол автоматты түрде қалыптасады және оны өңдеуге болмайды. Жіберу кезеңінде бұған дауласудың пайдасы жоқ: құжат не тексеруден өтеді, не өтпейді.
| 3 қарашаға дейін | Қазір | База үшін мәні | |
|---|---|---|---|
| Сыйақы | Бөлек жолмен, орны тексерілмеген | G бөлімінің бірінші жолында | Құжаттағы жолдардың ретін өзгерту |
| Атауы | Жеткізушінің қалауынша | Белгіленген мәтін сөзбе-сөз | Қызметтің толық атауын түзету |
| Шығу тегінің белгісі | Қағидалар бойынша қызметтерге «6» | «6», жүйе бірінші жолда тексереді | Жіберер алдында белгіні тексеру |
Порталда және 1С-те бұл әртүрлі жұмыс істейді
ЭСФ АЖ порталында бәрі оңай: «Экспедитор» немесе «Комиссионер» санатын белгілейсіз, жүйе бірінші жолды атауымен және белгісімен өзі қояды.
Есеп жүйесінде ЭСФ құжаттан жиналады, сондықтан жол дайын күйінде дұрыс келуі тиіс. Осы тексеруге арналған түзету сипаттамасын 5 қарашадағы релиздер мен толықтыруларда таппадық, сондықтан әзірге бәрі баптау арқылы жасалады. «1С:Бухгалтерия 8 для Казахстана» ред. 3.0 үшін тәртіп – PRO1C түсіндірмесі бойынша, біздің тәжірибелік ескертпелерімізбен:
- Номенклатура позициясын дайындаңыз. Қызметтің «Полное наименование» өрісіне – қате хабарламасындағы нақты мәтін, қысқа атауын өзгертпеуге болады. Біз бұл үшін бөлек позиция ашар едік: ескі қызмет басқа шарттарда қолданылуы мүмкін, ал жаңа ұзын атау соларға да тарап кетеді.
- Мәтінді теріп жазбай, көшіріп алыңыз. ЭСФ АЖ хабарламасынан қойып, соңында бос орын қалмағанын қараңыз.
- Сыйақыны шот-фактурада бірінші жолға қойыңыз. Жолдар іске асырудан немесе актіден тартылса, ретін сол жерде де өзгертіңіз, әйтпесе қайта толтырғанда бұрынғы күйіне оралады.
- Жіберер алдында жасалған ЭСФ-та «6» белгісін тексеріңіз.
- Бір құжат жіберіп, мәртебесін күтіңіз. Қазанның қалған құжаттарын содан кейін ғана алыңыз.
Егер ЭСФ өңдеу арқылы жиналса немесе сыртқы бағдарламадан XML арқылы келсе, тексеру сол, бірақ өңдеуді түзетуге тура келеді. Мұндай түзетулерді 1С пысықтау ретінде орындаймыз. Басқа конфигурациялар бойынша түсіндірмелерді әзірге көрмедік: логикасы сондай болуы тиіс, бірақ өріс атауларын орнында тексеріңіз.
Жалпы алмасу баптаулары мен басқа да жиі кездесетін бас тартулар туралы – 1С-тен ЭСФ жазып беру мақаласында.
Не түсініксіз қалды
МКК хабарламасы қысқа, онда үш сұрақ жауапсыз қалған. Болжам жасамаймыз:
- Комиссионер сатып алушыға сатады, ал бұл ЭСФ-та сыйақы жоқ. Кодекс жолды тек сыйақы болған кезде талап етеді, ал тексеру жалпы жеткізуші санатына сипатталған. Осындай жағдайға тап болсаңыз, ЭСФ АЖ қолдау қызметіне алдын ала жазып, жауабын сақтап қойыңыз.
- 3 қарашаға дейін жазылған құжаттарға түзетілген және қосымша ЭСФ. Түзетілген ЭСФ жазылған күнгі нысан бойынша жазылады, бірақ оған жаңа тексеру қолданыла ма, МКК нақтыламады. Алғашқы осындай құжаттан-ақ қараңыз.
- Шартта сыйақының бөлек сомасы жоқ. Бұл шарт пен экспедитордың салық тіркелімінің мәселесі, бағдарламаны баптаумен шешілмейді.
МКК хабарламасы бойынша ЭСФ АЖ қолдау қызметі: esfsd@kgd.minfin.gov.kz (тәулік бойы) және +7 (7172) 72-51-61 (9:00-ден 21:00-ге дейін). Өтінішке қате мәтінін қоса тіркеңіз.
20 қарашаға дейін нені тексеру керек
- ЭСФ-тың 10-жолында санат дұрыс белгіленген: комиссионер – «В» ұяшығы, экспедитор – «С» ұяшығы.
- Нақты толық атауы бар қызмет бар және ол құжатта бірінші тұр.
- Сыйақы жолында «6» белгісі қойылған.
- Сыйақы сомасы шартпен сәйкес келеді, ал тасымалдаушылар мен басқа жеткізушілердің қызметтері бөлек жолдармен көрсетілген.
- Сынақ ЭСФ жүйеде қабылданды, мәртебесі базаға қайтты.
- Қазан бойынша жазылмаған ЭСФ тізімі соңғы күнге дейін жабылады. Конфигурация көптен бері жаңартылмаса, 1С жаңартудан бастаңыз.
Егер база бізде сүйемелдеуде болса, чатқа жазыңыз, бірге түзетеміз. Тасымалға қатысты аралас тақырып – ТТН және жол парағы.
